Buradasınız Əsas » Bosman » Etibar Cəbrayıloğlu: “Messinin dərdi var, Messi xəstədi”
  • Bookmark and Share

Etibar Cəbrayıloğlu: “Messinin dərdi var, Messi xəstədi” 

Əlimizdən, hətta ayağımızdan gələni beş qaba çəkdik. Amma yenə alınmadı. Rusiyanı, Portuqaliyanı, İrlandiyanın Şimal hissəsini, İsraili gəzib-dolandıq, hələ yolüstü Lüksemburqa da baş çəkdik. Lakin cəmi-cümlətani 9 xal topladıq. 9 xala görə isə Braziliyaya getməyə heç kimə vəsiqə vermirlər. Foqts olmur istəyir lap Platini özü olsun. 9 xal yığan milli komandaların futbolçuları Braziliyada keçiriləcək dünya çempionatına yalnız televizordan baxa bilərlər. Ah, gözəlim Braziliya. Edson Arantes du Nasimentonun- və ya sadəcə Pelenin vətəni. Qarrinçanı, Karlos Alberto Torresi, Sokratesi, Artur Zikonu yetişdirən ölkə. Braziliyanın istənilən şəhərində hansısa bir küçəyə futbol topu atsan, ən azından 30-40 uşağın həmin torun arxasınca qaçdığının şahidi olacaqsan. Ah, gözəlim Braziliya... Karnavallar ölkəsi. Rəqs edən qızlara görə bu məmləkətin büdcəsinə milyonlar axır. Onlara baxmamaq sadəcə, mümkün deyil. Braziliyalı futbolçular və rəqqasə qızlardan söhbət düşmüşkən, uzun fasilədən sonra mudiala vəsiqə qazanan Rusiya millisinin üzvləri Bakıdan Moskvaya dönəndə şoka düşdülər. Moskvadakı hava limanında braziliyalı rəqqasələr kimi ekzotik geyinən qızları görüncə milli üzvləri çaş-baş qaldılar. ORT kanalı da bu qəribə mənzərəni bütün dünyaya göstərdi. Bir anlığa təsəvvür elədim ki... Üsamə bin Ladenin qarışdırıb getdiyi bu dünyada möcüzə baş verir. Berti Foqtsun rəhbərliyi altında millimiz Braziliyada keçiriləcək mundiala vəsiqə qazanır. Futbolçularımız gedib düşürlər karnavallar ölkəsinə. Elnur Allahverdiyev, Mahir Şükürov nə oyunlar çıxarırlar. Stadionda yox e, rəqs meydançasında... Yaxşı ki, möcüzə-filan baş vermədi və bu bəladan qurtulduq. Amma indi də Braziliyaya gedə bilməməyimizin bəlasını çəkirik. Millimiz son iki oyunda toparlanıb 4 xal yığdı və necə deyərlər, çulunu sudan çıxartdı. Braziliyada deyə bilmərəm, amma biz tərəflərdə hər kəs müxtəlif cür düşünə bilər. Bəzi azarkeşlər, futbolla yaxından-uzaqdan bağlılığı olanlar deyir ki, son seçmə mərhələdə 9 xal toplamağımız əla göstəricidi, Braziliyaya getmişkən varıq. Bəziləri isə sevincdən göyə papaq tullamağa, alman Foqtsa heykəl qoymağa heç bir əsas görmür. Şəxsən mən ikincilərin komandasındayam. Düzdü, millimiz bu seçmə mərhələdə 9 xal yığdı, Şimali İrlandiyanı evə əliboş yola saldı, son günlər azərbaycanlıları adamyeyən gözündə görən rusların qanını az da olsa qaraltdı. FİFA reytinqində bir xeyli irəlilədi. Amma əvəzində Lüksemburqu nə Bakıda, nə səfərdə məğlub edə bildi. Futbol meydançasının hansı tərəfindən baxsan, millimizin seçmə mərhələdəki gördüyü iş bayram keçirməyə əsas vermir. Sevinmək istəyəndə bu son illər alman baş məşqçiyə verdiyimiz bir ton pul gəlib durur adamın gözünün qabağında. Foqtsa xərclədiyimiz paraları almanın topladığı 9 xalla tərəzinin eyni gözünə qoymağa adamın insafı yol vermir. Tərəzinin ayrı-ayrı gözə qoyanda da pul tərəfi ağır gəlir. Yaman ağır gəlir. Aradabir Azərbaycana gələn, bu əziyyətinə görə də bir ton maaş alan Berti Foqtsun çalışdırdığı milli Braziliyaya vəsiqə qazana bilmədi. Az qala atdıqları hər aut üçün babat mükafat alan futbolçularımız mundialı televizordan izləyəcəklər. Özü də Braziliya qəhvəsi içə-içə. Onun-bunun hesabına dolanan Ermənistanın yığma komandası isə artıq başa çatan seçmə mərhələdə 13 xal topladı. Bunu elə-belə yazdım, sözgəlişi... “Ədalət” qəzeti

Ölmüşdü elə “Ağ Ev”… Amerika heç vaxt imkan verməz ki, Kreml Krımı Rusiyanın ərazisinə qatsın. Barak Obamanı prezident seçən dövlətin xasiyyəti tünddür, dovşanı araba ilə elə tutur, elə tutur ki, araba dovşandan, dovşan da arabadan razılıq edir.

Sovetin özü yoxdursa “Sovetski” necə qala bilər? Əgər o boyda məhəllədə park salınacaqsa, kimdi köçmək istəməyənlərin nazı ilə oynayan? Nə çoxdu boş-bekar buldozer…

Bütün bu problemlər zamanla yoluna qoyulacaq. İndi dünya daha qlobal məsələ ilə maraqlanır. Elə mən özüm də. Bəs necə, mən bu dünyada yaşamıram məgər? Messinin xəstələnməsini eşidəndən nə gecəm var, nə gündüzüm. Yeni dünya ulduzunun milyonlarla azarkeşinə qoşulub narahatlıq keçirirəm. Düzdü, bu mahir sehrbaz yenə meydana çıxır, ayağı və başı həmişəki kimi yaxşı işləyir. Yaşıl ot üstündə topun da, rəqib futbolçuların da başına oyun açır. Necə deyərlər, açıb, açır, açacaq. O gün “Mançester Siti”yə də qol atdı. Amma səhhətində problem yarandığı aydın görünür. Elə aydın görünür ki, elə bil Bayıl tərəfdə durub bulvardakı “Şeytan çarxı”na baxırsan…

Messi özü də sağlıq durumunda problem olduğunu etiraf edib. Təkcə ehtiyat yox, etiraf da Messinin yaraşığıdı. Deyib ki, məşq edəndə, oyuna çıxanda tez-tez qaytarıram. Argentinalı ulduz səhhətindən danışanda onu da deyib ki, İspaniyadakı həkimlər problemin nədən qaynaqlandığını tapa bilmirlər. Al, bu da sənə İspaniya. Messinin, Neymarın, Pikenin, Xavinin, Alveşin, Fabreqasın, Ronaldonun, Beylin, Modriçin, Ramosun, Benzemanın, Di Mariyanın, David Vilyanın, Suaresin, bizim Arda Turanın top qovduğu qos-qoca İspaniyada meydana bir həkim çıxa bilmir. Yekə-yekə danışmaqla… pardon, oynamaqla deyil e…

Allah yenə bizim məmləkətə bərəkət versin. Messimiz, Ronaldomuz, Beylimiz, Neymarımız olmasa da həkimdən boluq. Bizdə elə özəl klinikalar var ki, adları az qala Messi, Ronaldo kimi məşhurdu. Telekanallarda hansı verilişə baxırsan, həmin klinikaları tərifləyirlər. Təkrar deməyə nə ehtiyac, indi elə zamandı ki, qardaş qardaşı, ata oğulu pulsuz, təmənnasız tərifləmir. Telekanallar da özəl klinikaların ağ xələtinə, pambıq və bintinə aşiq olmayıblar ki? Özəl tibb mərkəzləri əksər verilişlərə sponsorluq edir, pul-para verir. Onsuz da dəb düşüb, bir də görürsən hansısa bir oxuyan qadın çıxır bahalı maşının üstünə və uca səslə deyir ki, bunu mənə sponsorum bağışlayıb.

“Argentinalı möcüzə”- Messi İspaniyada qaytarmağında, oxuyanlarımız bahalı arabaların damında şəkil çəkdirməkdə, özəl klinikalarımız da “Dədə, bizi niyə atdın”, “Ana, evə nə vaxt gələcəksən”, “Arvadımın əri” proqramlarına sponsorluq etməkdədi.

İspaniyadakı həkimlərdən düz-əməlli bir cavab ala bilməyən Messinin bizim özəl tibb mərkəzlərindən nə xəbəri? O, hardan bilsin, bizim klinikalarda vəziyyət necədi? Topla sehrbazlıq etməkdən başı açılır ki… Argentinalı eşitməsə də biz yaxşı bilirik ki, məsələ nə yerdədi. Özəl tibb mərkəzlərimizdə xəstələr şəraitin yüksək səviyyədə olmasından şoka düşürlər, yalvarırlar ki, həkim, ölüm qabağında. Dərhal da arzularına çatırlar.

İndi istəyirəm ki, ulduz futbolçunu sağaltmaq üçün vasitəçilik edəm, amma Minsk Qrupunun vasitəçiliyinə oxşamasın. Messinin əlindən tutub gətirim Bakıya, bizim özəl klinikalardakı həkimlərimiz onun dərdinə bir çarə tapsınlar. Messinin pulu da var, xarici pasportu da hazırdı. Lakin arada bir problem yaranıb, futbol oynamaqdan, topun anasını ağlatmaqdan vaxt tapa bilmir. Bir-iki tur cəzalansaydı buralara gəlməyə boş vaxtı olardı.

Ay Messisevərlər, vəziyyət belədi- həkim tapmışam, bəs Messiyə qırmızı vərəqə verə bilən hakimi hardan tapım?

“Ədalət” qəzeti

2 Şərh yazıya: Etibar Cəbrayıloğlu: “Messinin dərdi var, Messi xəstədi”

  1. Vaqif Rəşidov

    Məni bir şey çox narahat edir…Komandamızın ağır durumda olduğunu görüb,hansı jurnalistimiz Myanmar yığmasının son ay ərzində FİFA reytinqində 43 pillə aşağı diyirləməsi haqqında yazı yazacaq?…Hıyy?
    *****
    Bu yazı ayın 15-nin yazısıdır. Əlimizə bu gün düşdüyü üçün bu gün təqdim etmişik.

     
  2. Zəfər Lerikli

    Etibar Cəbrayiloğlunu heç yaxindan tanimirdim.”Rəvan”la kamandamizin Bayilda keçiriləcəyi oyunda onunla oturmaq qismətim oldu.Mən həmin oyunda yalniz bu insanin azarkeşliyinə tamaşa edirdim.Kamandamizin hər hucumunun sonucunda ayağa qalxib və əl çalmaqla həqiqi azarkeş olduğunun şahidi oldum və ona rəğbətim heç özumdə bilmədən urəyimdə artdi.Belə qələm sahiblərinin qədrini bilməliyik və belə insanlarla fəxr etməliyik.

     

Şərh əlavə et


səkkiz − 7 =