Buradasınız Əsas » Xəbər » Etibar Cəbrayıloğlu: Dənizliyə yol göstərmək
  • Bookmark and Share

Etibar Cəbrayıloğlu: Dənizliyə yol göstərmək 

Əlimizdən, hətta ayağımızdan gələni beş qaba çəkdik. Amma yenə alınmadı. Rusiyanı, Portuqaliyanı, İrlandiyanın Şimal hissəsini, İsraili gəzib-dolandıq, hələ yolüstü Lüksemburqa da baş çəkdik. Lakin cəmi-cümlətani 9 xal topladıq. 9 xala görə isə Braziliyaya getməyə heç kimə vəsiqə vermirlər. Foqts olmur istəyir lap Platini özü olsun. 9 xal yığan milli komandaların futbolçuları Braziliyada keçiriləcək dünya çempionatına yalnız televizordan baxa bilərlər. Ah, gözəlim Braziliya. Edson Arantes du Nasimentonun- və ya sadəcə Pelenin vətəni. Qarrinçanı, Karlos Alberto Torresi, Sokratesi, Artur Zikonu yetişdirən ölkə. Braziliyanın istənilən şəhərində hansısa bir küçəyə futbol topu atsan, ən azından 30-40 uşağın həmin torun arxasınca qaçdığının şahidi olacaqsan. Ah, gözəlim Braziliya... Karnavallar ölkəsi. Rəqs edən qızlara görə bu məmləkətin büdcəsinə milyonlar axır. Onlara baxmamaq sadəcə, mümkün deyil. Braziliyalı futbolçular və rəqqasə qızlardan söhbət düşmüşkən, uzun fasilədən sonra mudiala vəsiqə qazanan Rusiya millisinin üzvləri Bakıdan Moskvaya dönəndə şoka düşdülər. Moskvadakı hava limanında braziliyalı rəqqasələr kimi ekzotik geyinən qızları görüncə milli üzvləri çaş-baş qaldılar. ORT kanalı da bu qəribə mənzərəni bütün dünyaya göstərdi. Bir anlığa təsəvvür elədim ki... Üsamə bin Ladenin qarışdırıb getdiyi bu dünyada möcüzə baş verir. Berti Foqtsun rəhbərliyi altında millimiz Braziliyada keçiriləcək mundiala vəsiqə qazanır. Futbolçularımız gedib düşürlər karnavallar ölkəsinə. Elnur Allahverdiyev, Mahir Şükürov nə oyunlar çıxarırlar. Stadionda yox e, rəqs meydançasında... Yaxşı ki, möcüzə-filan baş vermədi və bu bəladan qurtulduq. Amma indi də Braziliyaya gedə bilməməyimizin bəlasını çəkirik. Millimiz son iki oyunda toparlanıb 4 xal yığdı və necə deyərlər, çulunu sudan çıxartdı. Braziliyada deyə bilmərəm, amma biz tərəflərdə hər kəs müxtəlif cür düşünə bilər. Bəzi azarkeşlər, futbolla yaxından-uzaqdan bağlılığı olanlar deyir ki, son seçmə mərhələdə 9 xal toplamağımız əla göstəricidi, Braziliyaya getmişkən varıq. Bəziləri isə sevincdən göyə papaq tullamağa, alman Foqtsa heykəl qoymağa heç bir əsas görmür. Şəxsən mən ikincilərin komandasındayam. Düzdü, millimiz bu seçmə mərhələdə 9 xal yığdı, Şimali İrlandiyanı evə əliboş yola saldı, son günlər azərbaycanlıları adamyeyən gözündə görən rusların qanını az da olsa qaraltdı. FİFA reytinqində bir xeyli irəlilədi. Amma əvəzində Lüksemburqu nə Bakıda, nə səfərdə məğlub edə bildi. Futbol meydançasının hansı tərəfindən baxsan, millimizin seçmə mərhələdəki gördüyü iş bayram keçirməyə əsas vermir. Sevinmək istəyəndə bu son illər alman baş məşqçiyə verdiyimiz bir ton pul gəlib durur adamın gözünün qabağında. Foqtsa xərclədiyimiz paraları almanın topladığı 9 xalla tərəzinin eyni gözünə qoymağa adamın insafı yol vermir. Tərəzinin ayrı-ayrı gözə qoyanda da pul tərəfi ağır gəlir. Yaman ağır gəlir. Aradabir Azərbaycana gələn, bu əziyyətinə görə də bir ton maaş alan Berti Foqtsun çalışdırdığı milli Braziliyaya vəsiqə qazana bilmədi. Az qala atdıqları hər aut üçün babat mükafat alan futbolçularımız mundialı televizordan izləyəcəklər. Özü də Braziliya qəhvəsi içə-içə. Onun-bunun hesabına dolanan Ermənistanın yığma komandası isə artıq başa çatan seçmə mərhələdə 13 xal topladı. Bunu elə-belə yazdım, sözgəlişi... “Ədalət” qəzeti

Ustadlardan sitatla başlayaq ki, yazımız oxunaqlı alınsın. Dünyanın ən böyük yazıçılarından biri saydığım Əziz Nesin “Bir sürgünün xatirələri” əsərində bizim hamıya məsləhət verməkdə usta olduğumuzu yazır: “Tanışa, dosta ağıl vermək bizdə adətdir. Birinə ağıl vermək üçün ürəyimiz gedir. Ay, aman, nə olaydı, qabağımıza biri çıxa, ona yaxşıca bir məsləhət verək-deyə gözümüz dörddür. Ağıl verməkdə bizdən əliaçığı tapılmaz”.

Ustadım tamam düz deyir. Elə biri mən özüm, necə gündü ki, tərs damarım tutub. Oturub-durub məsləhət vermək istəyirəm. Özü də kimə-kimə Mustafa Dənizli kimi ünlü bir futbol adamına. “Xəzər Lənkəran”ın baş məşqçisinə ağıl vermək üçün ürəyim gedir.

Klub Dənizlinin vətəni Türkiyədə tər tökür. Antalyada təlim-məşq toplanışına yığışan “Xəzər Lənkəran” mövsümün ikinci yarısı üçün hazırlıqlarını davam etdirir. Deməli, məsləhət verməyin əsl məqamıdı.

Mənə elə gəlir ki, Mustafa hoca kadr seçimində yanlışlıqlara yol verir. Türkiyəli çalışdırıcının bu dönəmdə buraxdığı səhvlər heç də yaxşı günlərini yaşamayan “Xəzər Lənkəran”a baha başa gələ bilər. Götürək elə Edu Oriolun klubdan geri göndərilməsini. İndiki məqamda bu futbolçunu İspaniyaya qaytarmaq nəyə lazım idi? İkinci dövrənin başlamasına az qalıb, futbolla nəfəs alan lənkəranlı azarkeşlər Mustafa Dənizlinin meydana buraxdığı futbolçuların oyununa baxmaq üçün stadiona axışacaqlar. Yəni stadionun girişində basabas yaranacaq. Bütün bunları nəzərə alıb ispan futbolçu Edu Oriolu klubun mühafizə xidmətinə işə götürmək lazım idi. Təcrübəli futbol adamı kimi Edunun bu vəzifədə kluba köməyi dəyə bilərdi.

Moskvada yaşayan Səyavuşdan tutmuş İrana gedən Dadaşa kimi bütün “Xəzər Lənkəran” azarkeşləri məni qınayacaq ki, guya mən türk futbolunun əfsanəsi Mustafa Dənizlinin işinə qarışıram. Amma işə qarışmamaq, ünlü məşqçiyə məsləhət verməmək də olmur axı.

Götürək elə Nikola Qliqorovu. İlin-günün bu vaxtında makedoniyalının Antalyada nə işi var? Hamı bilir ki, Lənkəran stadionunun ot örtüyü, drenaj sistemi yaxşıca bir təmirə ehtiyac duyur. Səhvən Makedoniya millisinə dəvət alan Qliqorov xərəkdə qum, ot daşıya bilir. Mustafa hoca da ona xərəkdə ot daşıtdırmaq əvəzinə Antalyada futbol oynamağı öyrədir. Lap açığı, gərəksiz bir işlə məşğul olur.

Məndə və bütün “Xəzər Lənkəran” tərəfdarlarında olan məlumata görə, türkiyəli çalışdırıcı klubda dəmir nizam-intizam yaratmağa çalışır. Hətta həkimlərə futbolçuları daşıyan avtobusa minməyi yasaqlayıb. Deməli, həkimlərə, masajçılara başqa bir avtobus xidmət göstərəcək. Avtobus da öz-özünə gedən deyil ki, onu kimsə sürməlidir də. Zohir Benouahini qoyub biz niyə təzə sürücü axtarmalıyıq? Zalım oğlu futbol oynamır, heç olmasa avtobus sürsün. Özü də onun sükan arxasına keçdiyi avtobusu heç bir yol polisi işçisi saxlamaz. Kimdi bu qəliz ad-soyadı olan sürücü ilə asfaltın ortasında çənə döyən?Başqa klublar balonlarla göyə uçur, Mustafa Dənizli isə hələ də Benouahidən möcüzə gözləyir. Mən də məsləhət görürəm ki, ondan möcüzə-filan gözləməsin.

Dənizlinin həmvətəni ustad Əziz Nesin demişkən, ağıl verməkdə bizdən əliaçığı tapılmaz. Mən də bu yazıda əliaçıqlıq etmək istədim.

Lap yadımdan çıxmışdı. Budəfəki transfer dönəminə də bir quş…

3 Şərh yazıya: Etibar Cəbrayıloğlu: Dənizliyə yol göstərmək

  1. R.S.

    Etibar bəy elə hamı gedib quş gətirirdə ..Heç olmasa ustadın sözünə qulaq asıb ağıl verməkdən baz keçəydiniz.
    Sən bilmirsən ki əzər balamız ağör xəsəliyə düçar .olub .Deyirlər ki Ruminiya da bir Loğman var ,Bəlkə o bu balanın dərdinə dərman olu .Amma gömrük postunda duranlar onu bura buramağa icazə versələr .

     
  2. van persi

    topaz premerliqasinin ilk 11-i bele olmalidir menim fikrimce qapida kamran agayev mudafiye sol cinah vanderson sag cinah maksim medvedyev ortada resad sadiqov ve skarlatake yarimmudafiye ortada rahid ve almeyda sol cinahda reynaldo sag cinah tom kara hucumda kamanan mbilla etame

     
  3. Zefer Lerikli

    AĞİL AĞİLDAN USTUNDUR.

    Mən hec görmədim ki kimsə öz ağlindan gileylənsin.Kiməsə öz ağlimizla bir məsləhət vermək istəmişiksə,həmişə “öz ağlim özumə bəsdir,ğet özuvə ağil öyrət”-ifadəsi ilə rastlaşmişiq.Belə baxanda kecmişlə muqayisədə muasir dövrdə hami ağillidir.Ata-babalarimizdan “AĞİL AĞİLDAN USTUNDUR”-kəlami deyəsən elə kecmişə aid olub.Axi o vaxt “Odnaklassnik” yox idi.Şoubiznes yox idi,aciq-saciqliq ayib sayilardi.Ona görə mudrik insanlar var idi,xulasə sözun dəyəri var idi.Elə o vaxtda turklər səhf edəndə başini qapiya cirpar və “bu benim akilsiz kafam!” -deyərdilər.Ən azi turk filmlərdə bunu görmək olardi.İndi əliaciqliq edib məsləhət vermək hunər tələb edir ,əziz Etibar muəllim!.Mən əliaciq deyiləm və məsləhət verməkdə istəmirəm.Oğul istəyirəm ki,klubdaki bəzi insanlara məsləhət verən olsun.!.Əgər beləsi varsa,duşunməyin ki, bu azarkeşdir.Bilirsinizdə niyə?.Beləsi varsa ,elə mənə yol görsətsin.Elə bilirsiniz ki ,”ağila” məsləhət duyan tapa bilərsiniz.

     

Şərh əlavə et


4 − = iki